Chungkhar Vanram

Dr. Roland Ceu ( Ph.D)

Hi bantuk in 2012 PCCf zerhtin maivan phungchimnak ah a voikhatnak phungchimnak can ttha ka hmuh ca ah, nawlngei tu upa vial te nan cungah ka lunglomhnak ka vun langhter. Pathian bia ah kan kal cawlh ko hna lai.

Pathian lawmhmi/ Pathian lung atongmi (Genesis 6: 5-6)

Pathian nih a sermi minung a zoh tikah a lung a tongtu/ a lawmhter tu an um lo I, Pathian nih hitihin bia a chim, “Minung ka ser hi ka ngaichih, an dih lak in ka thah dih hna lai a ti,” A sermi mi nung sin in thawng chia tuk kan theih lioah, thawngttha tuk pakhat a um ve. Noah nih cun Pathian lung a ton (or) a lung alomhter. Noah chan bantukin can a dongh lai ah cun an ding an ei lai, Biaknak cu a leng lawng in an I tlaih lai, sual a karh lai a ti i, a tu hi a tling cuahmah cang.

Laimi nih puai tampi kan ngei hna, a sinain kan puai kan hman ning cang hi kan nganh deuh ko rua ti in ka hmuh. Chin miphun ni (CND), kan tuah I a zan cu Zuri le nupa sualnak le I velhnak in a khat cang. Christmas kan tuahning zong hi Pathian a lung kan tong hnga maw ti hi vuitam pi karuat tawn? Kan hawipa nih cun, laimi ii Puai kan ngeih mi poh hi “sual thla, fathah thla, zudin thla, lainawn thla, sifahmi hna ngaihchiat in umnak thla” ah a cang a ti tawn. Cu cu ka ruah ve tik ah a si tak ko lo hme maw ti in a can can ah cun ka ruat tawn ve. A sinain pathian nih cun amah a lung a tongtu chungkhar a hmuh ah cun aa lawm tuk ko lai. A tu lio ah hin Pathian nih Noah te chungkhar bantuk minung a kawl hih.

Noah chan minung cu ti nih a phum hna lioah, Noah le chungkhar cu ti nih cungah a kaipi hna. A tu lio zongah vawlei mi nih cun ttaih inn a ngeimi, hmanlung a ngeimi, dawr lian pi pi a ngeimi, ramdang I fanu fapa a ummi hna khi mi vanttha kan ti hna. Pathian nih cun A mah lung a tongmi hna chungkhar lawng mi vanttha chungkhar a ti hna.

Lamkaltu 16:29-34 kha ttha te in rak relhmanh, thongbawi chungkhar kong kan hmuh khawh. Thongbawi a si na in a lung ai lawm kho lo. Bawi sipoh/ rengsang sipoh, mirum sipoh, mi nih cawisanmi sipoh zong hin hnangamnak lunglomhnak hi a rak um lem rua lo. Paul le Silas cu thongah an tla nain lunglomhnak an ngeih mi cu thongchung zong ah an nilawm tthiam2 ko. Kan nih cu hneksaknak/ harnak tlawm te kan ton hmanh ah thih kan ni tim, kan zumhnak hna a tlau pah tawn, kan zumhnak hna biak inn chung kan um chung lawng ah a lang tawn. A can can ah cun mi zei kan si hna kan ni philh ttheu tawn, An zumhnak cu Pathian sin ah a hmunh peng ca-ah Thonginn chungah pathian sunparnak alang. Mi nung lei khel in cun thong an tlak tik ah cun mi vanchia kan ti hna lai nain, thonginn chung zong in pathian sunparnak a langkho ko. Nangmah lei kei mah zong hi kan umnak hmun le hma cio in Pathian sunparnak a langhter tu ding ah thim mi kan si. Kan zumhnak kha a hmunh peng ve a hau. Biakinn chung lawng ah krihfa kan si ding a si loh, Paul el Silas bantuk in thawngin chung kan um zongah siseh, khui ka hmun poh ah kan zumhnak, Pathian ca-ah witness kan si peng ding kha a bia pi ngai.

John Wesley le a unau kong hi phungchim thiam pawl nih tah chunnak ah an lak tawn hna, mitarual ngai si dawh an si. An unau rual in an I daw ngai ngai hna ti a si. Pathian muisam an chungkhar ah hmuh khawh a si an ti. John Wesley te chungkhar cu a nu nih a nunzia in a cawn piak tawn hna ti a si. An chungkhar nih an degree hna/ an reng hna/ an rumnak hna kha chungkhar lawmhtertu an si an ti lo. Biak inn ii va kal ii heh tiah va lam len, thangpi in thlacam len hna kha an chungkhar a nuamhter tu an ti lem lo. An chungkhar ah an dih lak in pakhat le pakhat zohchun awktlak in an um le, an ni lomhnak cu Pathian bia ah a si. An zumh mi fiangte in an hngalh, An zumhnak ah an hna a ngam, phungchim thiam pawl nih an chim tawn mi cu vuikhat cu D.L Moody kha bia an hal ee ti a si, zeiah nahmai hi a penh peng tiah bia an hal? A leh mi hna cu Ka nu hi a thin hun/ a hmai penh lo ka hngal/hmu bal lo I, hmaipenh lo in um hi ka thiam ve lo a ti. Chungkhar ah hmuh an duh bik mi cu krih nundawh/krih lungput/hmaipenh te in um hi a si. Kan nih teh John Wesley le D.L Moody te chungkhar bantuk in ni fa tin kan nunnak ah pathian lunglomhter tu/ Pathian mui sam keng tu ding ah thimmi/ fialmi kan si hi kan ni theih ngai a hau ve. Micheu khat cu hmundang ka dang ah cun kan ni nuam ngai hna i kan inn chungkhar tu ah-cun saram hlemhcia mi ban tuk-in kan puar hrang. Chawnh ngam dingin kan um lo. Kan chungkhar kan fa le kan nu pi le kan u nau/kan nu le kan pa hmanh nih zumh lo mi, chawnh ngam lo mi lungton lo mi kan si ah cun, Pathian lung cu kan tong kho/lawmhter kho hnga maw? A tak tak ah cun innchungkhar ah cun I nuamh in hmaipenh te in um ding a si na-in, Hmundang/ ka dang I kan ni nuamhlo hmanh ah kan innchungkhar tal ah cun I nuam hna uh sih, I lawm uh sih, zohchun awk tlak in um uh sih, Khuazei ka kan umnak hmuh poh ah pathian muihmai/ pathian lung a lomhtertu si ding ah I zuam ding kan si. Kan dih lak ca ah Pathian nih a ttha mi a um a ti ah cun thlachuak kan pek piak ko seh!!! A men.