Bawi Jesuh Khrih hi na daw tak maw?

(Do you truly love Jesus Christ?)

Upa vo ngaingai ah kan ruah mi, tu zingah a sung lawi tukmi a biathiang chimnak can tha ka hmuh ca’h Pathain ka thang that, cun caan a ka thiah tu upa/hruaitu le a reltu nan cungah ka lunglomhnak ka rak langh ‘er hma sa. Kaa in chimmi tluk in ca in tial mi thawngthabia hi a sauh ve ah cun a rel tu ca’h a fawi tawn lo cu ca’h cun a tawinak in kai zuam lai, nain Dr, Ph.D pawl hmai i chim bel hi a fawi ve loh hih!

 Tuzing ah i ruah tti hna usih ti’h kai thim mi ca cang cu:

John 21: 15-18, ¹⁵Rawl an ei dih hnu ah Jesus nih Simon Peter cu a thawh I, John fapa Simon hi hna nih an ka dawtnak hin nang nih na ka daw deuh maw? tiah a ti “ Asi, Bawipa, kan dawt kha na hngalh, tiah a leh. Jesus nih, ka tuufa tete kha zohkhenh hna tiah a ti “¹⁸Biatak kan chimh: na no lio ah cun nangmah nih na taisawm kha naa sawmh I na duhnak poh ah na kal tawn, sihmanhsehlaw, na tar tikah cun  na kut khan a zao hna lai I midangnih na kut cu an ttem hna lai I na duh lo nak hmun ah khan an in kalpi lai tiah a ti..(a Bible ca caang a sau deuh cah 15, nak le 18 nak lawng ka van tial).  An chim tawn mi kan theih mi cu, Jesuh nih hin, Peter hi voi thum tiangtiang hi na ka daw maw tiah a halnak a ruang cu, Peter nih voi thum tiang a rak hlawt (renounced/denied ) ca’h a si an ti

Vawlei cungah hin, mizeipoh nih hin kan tawn cio mi or hrial khawhlo mi kan ngei cio, cu cu ai khat dih mi an si, mah cu cu “biahal nak”(question) a si. cu a si ca’h, tuzingah hin bia pa khat cio hal kan duh hna (a mah bel te, mi pa khatkhat bia kan hal tik hna ah hin, zei tin dah a ka leh hnga ti ah kan ruat I a kan chimh hlan/leh hlan paoh cu mah a result te kha kan hngak, a si nain tuzing I kan hal mi bia hal nak bel theih khawh-colh mi result a si) mah cu cu, Bawi Jesuh hi na daw taktak maw? ti hi a si. Mah a result te cu, ka dawt ko ti’h na ti lai ti hi a ho poh nih kan ti lai tiah ka ruah. Zeiruangah dah kan dawt tiah kan leh lai lo? Cun Jesuh kan dawt kan ti cu a mah nih a rak kan dawt hma sat ca’h a si.(I John4:19, we love because he first loved us) cu ca’h cun, Kan nun nak ah hin mah te hi thuk deuh/kau deuh in van ruat tti hna usih ti kan sawm tthan hna. Nanngmah le kei mah ca’h a nun nak a pe mi Jesuh hi na daw tak maw? or ka dawt tak maw? ti hi a bia pi ngaingai. kan dawt tak tak ko a si a si ah cun, Bawi Jesuh nih Peter sinah a chim mi bia hi kan mah zong hal ve kan si ko. Jesuh nih Peter kha na ka dawt ah cun ka tuu kha zohkhenh hna a ti. Kan dawt ko ti lawng hi a za hrimhrim loh hih, a tuu run zohkhenh hi kan dawtnak kan langh ternak te a si. Jesuh nih hin Peter kha voi thum tiang te na ka daw maw? ti’h a ti. Peter nih kan dawt ko ti’h a hal chung poh a leh ve. A sulllam cu na ka dawt ah cun ka tu kha cawm hna a ti duh nak cu, ka rian thiangkha ttuan ti kha a chim duh mi cu a si. Nihin ni ah hin kan Bawi Jesuh hi kan dawt ko kan ti ko ah cun a rian thaing kha tuan ko hna u sih, a tuan cuahmah/lio mi zongkan um ko lai, kan dih lak in kan dawt kan ti ah cun a rian thaing tuan kha a kan cah taak mi cu a si. Pathian rian ah hin a lam kip in ttuan khawh si ko, a bia thiang chim nak in maw, pek nak nun in maw phun dang dang cio in ttuan khawh a si ti hi kan theih peng mi an si ca’h kan theih lawng hin a rak za lo, kan dawt kan ti tiang hin a rak za hrim hrim lo.

Ahme 18, nak zawn ah Jesuh nih a peh tthan mi cu, na no lio ah nangmah nih na tai-sawm kha na sawmh I na duh nak paoh ah na kal, nain na tar tik ah cun na kut kha na zao hna lai I na duh lo nak hmun ah an in kal pi lai ti ah a ti. Jesuh nih hin, a chim mi a sullam cu na ka dawt hnuah cun nanmah duh nak ah hin na kal ti lai lo, kei mah nih kan chimh/fial mi tu ah hin um/ttuan ding ti hi a chim duh mi a si ti ah ka ruah/zumh?  Cu ca’h cun pei Jesuh nih ngatlai tu si ti lo in mitlai tu ah kan ser lai a ti nak cu a si cu. Peter nih hin a hlan ah, mitlai a si ti hi kan hmu bal loh, Jesuh a dawt hnu/theih hnu tu ah mitlai ah ai chauh, a rak duh deuh mi tu cu nga-tlaih i zuar kha a rak duh deuh mi tu rak si.  Peter nun nak ah hin nga-tlaih nak in mitlai si nak in van i thial kam hi a fawi hrim lai lo, Bawi Jesuh nih a chimh mi, a tuu tete a cawm nak, zohkhenhnak hna ah hin a lung a dongh caan a um kho, a har ngai ngai in a ruah caan a um kho mi a si. Cu ve ban tuk tthiam tthiam in, a rian thaing kan ttuan nak ah hin a har ngai lai, a in zia a har caan zong a um ko lai lungsau thin fual bu in kan ruah a herh ngai ngai.

 Genesis 29:15 nak zawn in kan rel ah cun Jacob nih a pu Laban fanu Rachel a conak kan hmuh. A tawinak in kan chim lai. Jacob nih Rachel co nak dingah a pu Laban sin ah kum-sarih chung a rian a ttuan piak, phun dangin kan chim ah cun, kum sarih chung a pu Laban rian a ttuan piak khawh in a fa nu Rachel a co ding a si. kum sarih a vun tlin tik ah cun a pe rih loh, a rak rianh cia mi can kum sarih chung a rian a ttuan piak tthan, Rachel co nak dingah. Bible nih fiang te’n a chim, Jcob nih a dawt tuk mi Rachel co nak dingah kum sarih chung cu ni tlawmte men ah khin a rel a ti. Jacob nih hin Laban fanu co nak dingah hin kum hlei-li chung hi lungnuam te in a hngah khawh. Ze ca’h dah a si ti ah cun a dawt tuk ca’h a si. Ni hin ni ah hin kan dawt mi a rian kan ttuan piak mi Bawi Jesuh nih a kan fial mi a rian kan tuan nak ah hin har lang mang le lung dong leng mang in kan um hmanh ah, ni ni khat ah a kan fial tu Bawi Jesuh he kan i hmuh/ton lai nak ah nuam le lawm te in lung sau te’n hngak bu in a rian thaing hi ttuan peng ko hna usih ti hi a donghnak ah chim ka duh. Kan tuah/ttuan mi thil vial te zong hi amah ca’h si dih ko hna seh, a sun parnak ca lawng te ah si ko hna seh.

Paul zong nih, kan nun ah cun Bawipa ca’h kan nung i kan thih ahcun Bawipa ca’h kan thi a ti (Rom14:8). Kan nih kan zapi te, Bawi Jesuh a daw mi kan dih lak zong hi a mah ca’h kan nun i a mah ca’h kan nun nak zong hi a loh ve awk a si ko ti hi chim ka duh. Ka hawi pa Thomas nih a rak chim mi cu, I live for Christ, and lost soul, a rak ti bal. Tu zingah hin mah a bia te cu ka lungah a hung chuak. Bawi Jesuh hi kan dawt tak tak ko a si ah cun a rian thiang ttuan i, cun kan nun zongah a mah ca’h, cun kan thih zongah a mah ca’h thih hi Bawi Jesuh nih a kan duh piak mi a si. Adonghnak bik ah, ni ni khat ah cun thil dang dang kan tuah mi thil hna le kan ttuan mi thil vial te hna hi kan i chir can an phan te lai, sihmanhsehlaw a rian thiang kan ttuan mi bel hi kan i chir khawh lo mi, a mah nih a kan lomh pi mi a si te lai ti zumh nak he, Pathian nih thlua kan chuah piak hram seh….

 All the blessings,

Tluang Zel Thang

    Philippines