Psalm 103:1-5; 88:15

1“Maw ka nunnak Bawipa cu thangthat tuah, ka sining vialte a min thiang cu thangthat tuah uh”, 5 ka nunnak cu thil tha in na khah ter i cucaah ka no peng i mupi bantuk in ka thawng.(Psalm 103:1-5).

Ka ngakchiat lio tein temhnak ka ing lengmang i thihnak ka naih zungzal; dan na ka tatmi ka phorhnak ah ka ba cikcek cang( Psalm 88: 15)

A tu bantuk in PCCF chungkhar sinah Pathian bia i hrawm ti khawhnak can tha ka hmuh than khawh caah cantha aka sersiam piaktu kan biak Pathian a min ka thangthat i tawlrel tu le hi online sermon in thazang lak dingah can pek tein areltu nan dihlak cungah kaa lawm, Pathian daihnak nan cungah um ko seh.

Hi Bible cacang pahnih hi kan zoh tikah Psalm hlaphuahtu pa nih Pathian sinah a chim mi bia le hla veve an si. Pathian sinah vuihramnak bia le hla le Pathian sinah lunglommhnak le thangthatnak  a sak mi hla phun hnih  an si.

Psalm hlaphuahtu pa nih a phuah mi hla in a nunnak ah zei dah a ton ti kha a bia nih fiang tein a langhter. Minung asi ve bantuk in can cankhat ahcun a nunnak ah vawlei nih a chuah pi mi harnak, sungh zatlaknak, vanchiatnak kan ti mi le teminnak a phunphun nih a tlunh hnawh ve i Pathian sinah vuihram in a um lio can zawng a um taktak ve ko ti hi Psalm 88:1-15 kan rel tikah kan hmuh khawh. Ka ngakchiat tein temh innak ka ing lengmang i thihnak ka naih zungzal; dan na ka tatmi ka phorhnak ah ka ba cikcek cang tiah lung fak ngai in Pathian sinah a vuihramnak bia nih zei tluk harnak le temh innak dah a nun ah a ton ve ti kha a langhter.

Asinain 103;15 tiang kan rel than tikah, “Maw ka nunnak Bawipa cu thangthat tuah, ka sining vialte a min thiang cu thangthat tuah uh! 5 Ka nunnak cu thiltha in a khah ter i cucaah ka no peng i mu pi bantuk in ka thawng a ti than. A nunnak taktak in Pathian a thangthat tu pa nih  ka nunnak cu thiltha in a khah ter tiin Pathian thluachuah a co tinmi cungah thangthatnak hla asa mi pa nunnak zongah hin harnak le sungh zatlaknak a nunnak ah  zuam cawhmi ( challenge) a phunphun a ton ve ti hi a hla phuahnak nih  a langh ter ngaingai.

Mother Teresa nih, “Life is challenge, meet it”, “Life is an adventure, dare it”,  a ti ve.

Philippine ka phanh in ka ca cawnnak chung ah chim len awk ngaingai in harnak ka tong hraw lo Pathian thawngin, asinain Thesis tial ka vun thok i Out line thut ka vun timh ah ka Advisor nu nih na Title hi na tlen ah a tha lai a kau tuk i na ti kho lai lo a ka ti. Maam ka zuam ko lai mah theng theng hi tial ka duh ka ti, a ka ti mi cu, “you like challenging?” Aka ti Yes Maam I like challenging ka ti ve, zei ca tiah cun a har mi research study chung in cawn awk thil tam pi ka ngei lai ti ka zumh ka ti. A taktak ah ka vun tial ciammam cu ka interest tuk ka chap mi le ka cawn mi zawng atam tuk ve, asinain a kau tuk deuh in ka thawk tikah le ka thluak dihlak chuah in ka tuah ka ti mi cu  ka Advisor nu sin ka kal pi a lung a tling lo tuah than a ka ti, zei ti hlei tuah awk ka thei ti lo, You said I like challenging a ka ti cang, ti awk ka thei lo ka thluak a lin dih. Final defense hi March 2, 2013 ah  a hnubik can khiah piak mi ah thut ding ti asi, nain Pre-oral defense lawng ka thu kho rih. April2 ah Department Council ah requirement vialte ap dih ding asi mi kha English edit lawng tuah asi rih hawi. April 4 ah Academic Council   hlan ah ap khawh lo ah cun Graduation luh khawh lo ding ti asi cang. Ka advisor nu nih na Graduate kho lai lo aka ti . Maam ka zuam ko lai ka ti chih peng rih. Thla ka cam, zan zongah ka mit ku a thaw kho ti lo, thathi ka hgilh kho ti lo, ka ei ka zong a thaw ti loh, mah vialte a kumkum in phaisa tampi dih in kaa zuam mi Graduate khawh lai lo ding ka ruah ah ka celh lo. Asinain ka lung adong thiamthiam lo, a hramthawk in tutiang lam a ka hruaitu Pathian nih a donghnak tiang aka kal pi ko lai ti ka zumh chih peng rih. April 3, 2013 zanlei 5pm last minute ah ah tlamtling tein ap hnga ding vial te ka ap khawh dih. Ni hnih chungah khuaruah har tuk in Pathian nih ka cungah rian atuan, hlawhtlinnak aka pek mi ka hmuh tikah aw Pathian khuakhannak kan ti mi hi a tuantuk zawng asi lo atlai tuk zawng asi lo, On time bak pei a rak si tak ko hi, Pathian lam hruainak kan ti mi zawng hi acheuchum tiang lawng asi bal lo adih donghnak tiang lamhruaitu pei a rak si taktak  ko hi ti ka hmuh ton mi chungah ka hmuh tikah kaa lawm kho tuk,  ka Advisor nu zawng aa lawm tuk, ka hawi le ka Professors te zawng an i lawm tuk cio an khuaruah zawng ahar zei tluk rang in tlam a tlin khawh mi cungah Pathian thangthat lo in ka um kho lo. Harnak le zuam cawhnak a phunphun ton mi chungin hmuhmi theipar cu a sunglawi khun, a thlumal khun ko,ti ka nunnak ah ka teh ve tikah harnak le zuamcawhnak phunphun kan tonmi hna hi i fahsak ding le ngeihchiat ding lungrawh ding an rak si hrim lo, kan nun haarnak ding caah le thatnak ding caah Pathian nih a hman mi hriamnam pakhat asi ve tiin ka hmuh.

 “Maw ka nunak Bawipa cu thangthat tuah, ka sining vialte a min thiang cu thangthat tuah uh  ti in thangthatnak hla a sak khotu Psalm hlaphuah tu pa  nunnak kan zoh tikah  harnak le sungh zatlaknak teminnak, zuamcawhnak ton lo in hi thangthatnak hla a sak mi cu a rak asi hrim hrim lo ti hi fiang tein hmuh khawh asi. Harnak  le sungh zatlaknak, zuamcawhnak phunphun tampi lak chung in Pathian nih lam a hruainak le a um pi nak thluachuah a peknak chung in hi thangthatnak hla hi a nunnak bak in a sak khawh mi asi. Hi thangthatnak hla hi amah Psalm hla phuahtu pa ca lawng asi hrimhrim lo, nangmah le keimah  ca zawng ah asi kho ve mi asi. Psalm hlaphuahtu pa a nunnak thil tha in a khah tertu, hlawhtlinnak le thluachuah a phunphun ape tu Pathian hi nangmah le keimah kan Pathian zong asi ve  ti hi tuzing canah keimah pumpak ka ca cawnnak chung ka hmuh ton mi in thazang pek kan duh ve hna. Kan dihlak cungah Pathian thluachuah um ko seh.

Lawmhnak tam pi he,

Ngaai Meng