THAWHTHANNUN

                                      ( Matthai 28:1-10 )

Biahmaithi: Tuzing kan Bawipa Jesuh Khrih a thawhthan ni sunglawi ah a biathiang i hrawmti kho ding in caan tha a ka pe tu Pathian min ka thangthat i PCCF kan u le hruaitu hna cung zong ah kaa lawm ti vun chim ta ka duh. Tuzing caan ah ‘thawhthannun’ tlangtar in Pathianbia i hrawm ti hna u sih ti ka duh. Kan baibal cang thim ah rak lut colh ko hna u sih law…

Matthai 28:1-6 tiang kan zoh tikah, Mary Magdalin le a dang Mary cu zarh khat chung i ni hmasa bik ni khuadei kate ah khin, Jesuh thlan va zoh awkah ah an kal. Chikkhate ah khin li aa hnin i Bawipa vancungmi pakhat vancung in a rung tum i thlankhar kha a thawn i a cungah cun a thu. Vancungmi nih khan nu cu a thawh hna i, nan thinphang hrimhrim hlah u. Vailam tahnak thing i khenhchihmi Jesuh nan kawl ti kha ka hngalh.  A mah cu hika ah hin a um ti lo, a chim bantukte khan, a tho than cang tiah a ti hna. Hika baibal cang nih fiang tein a kan cawn piak mi cu Mary Magdalin le a dang Mary cu an thinlung an ruahnak dihlak le an caan pek in zarh khat chung i ni hmasabik ni khuadei kate ah Jesuh thlan va zoh awkah an kal ti kan hmuh. Phundang in chim ah cun an nunnak taktak in Jesuh an kawl ti hi kan hmuh khawh. Kan nih teh  nitin kan nunnak ah Khrih zei tin dah kan kawl cio ti hi pumpak i check cio tuah hna u sih. Nitin kan nunnak ah hin kan thinlung ruahnak dik lak le kan caan pek in Khrih Jesuh a kawltu kan si ve ding hi a bia pi ngai.

Vv.7-8 Chungah kan hmuh khawhmi cu ‘khulrang in va kal u law a zultu hna kha, thihnak in thawhter a si cang i a tu cu nan hmaiah Galilee ram ah a rak kal chung cang; khika ah nan va hmuh lai tiah va chim hna u. Cucaah i hnawhnam ngaiin thlan khan an kir, an thin a phangpah an i lawmpah i a zultu hna va chimh awkah khan an kal. Hika vv.7-8 nih a kan cawn piak mi cu Bawipa vancungmi nih va kal u law a zultu hna kha, thihnak in thawhter a si cang i nan hmai ah Galilee ram ah a rak kal chung cang tiah va chim hna u. Bawipa vancungmi nih cu tin a chimh hna bantuk in nu hna cu thlan in i hnawhnam ngai in le thinphanpah i lawmpah in cun zultu hna chimh ding ah cun an kal. Hi Baibal cang nih a kan cawn piak mi cu ‘thawhter a si cang’ ti le cu thawhter a si nak thawngtha cu a zultu hna va chimhding hi a si. Bawipa vancung mi nih a chimh hna bantuk in Mary Magdalin le a dang Mary cu zultu hna va chimh ding ah an kal ti kan hmuh. Cun Khrih a thawhthannak thongpang nih lawmhnak a pek hna i a zul tu hna va chimh ding ah an kal. Hi nih a kan cawn piak duhmi cu kannih zumtu vialte zong Khrih a thawhthannak ni le a thawngtha hna hi mi sin ah au pi le chim phuan a kan duh piak ve. Khrih a thawhthannak thawngtha nih lawmhnak tak tak le a thawngtha au pi duhnak thin lung a kan ngeih ter ve maw ti hi i ruat cio tuah hna u sih.

Vv. 9-10 nih a kan cawnpiak mi cu ‘Jesuh nih duak tiah a vun ton hna i nan sinah daihnak um ko seh, tiah a ti hna’ ti hi kan hmuh. A cung i ka langhter cia bangin Mary Magdalin le Mary cu zarhkhat chung i ni hmasa bik ni khua dei kate ah Jesus thlan zoh ding ah an kal ti kan hmuh. Cun a pa hnihnak ah Bawipa vancungmi nih thihnak in thawhter a si cang, khulrang in va kal uh law a zul tu va chim hna uh tiah a ti mi hna kan hmuh. Mary Magdalin le a dang Mary nih an thin lung tak in Khrih an kawl bantuk le Bawipa vancung mi nih a chimh ning hna in an tuah bantuk in Khrih cu an sin ah a lang ti fiang tein kan hmuh. Zumtu kan nunnak ah hin Khrih thawngtha  nih a kan cawnpiak mi hi kan zumh le kan nunnak ah kan i nun pi a herh. A biathiang kan i tlaih i a kan cawnpiak mi kan zumh ko si cun Pathian nih pumpak kan nunnak ah a thiangthlarau thiltikhawhnak in a kan ton ve lai i a kan um pi ve ko lai. Cucaah cun Mary Magdalin le  a dang Mary ban tuk in kan thinlung, kan ruahnak le caan pek in Khrih a kawl tu si ve hna u sih. Cun a thawhthannak (thihnak nih a tei lonak) thawngtha hi a au pi tu si hna u sih. Cu ti  kan thinlung kan ruahnak dih lak in Khrih a kawl mi le a thawngtha a au pi tu kan si ahcun nitin kan nunnak ah Khrih sin in a ra mi daihnak le hnangamnak kan hmuh ko lai. Khrih cu thihnak nih a tei kho lo nihin ah thawhter a si cang. Nifatin kan nunnak ah Khrih a kawltu tak tak kan si i a kan fial bang in a thawngtha a au pi tu kan si a si ah cun kan tuah tuan mi kip ah Khrih nih a kan tel pi lai i teinak hlawhtlin nak a hmutu kan si ko lai. 

Saya Kio Nawl Hmung

Baguio City