“BAWIPA KAN CUNGAH AA LAWM HNGA MAW”

Isaiah. 30: 18, Asinain nan cungah a velngeihnak langhter duh ah Bawipa nih an hngah ko hna. Amah nih cun a dingmi thil kha a tuah zungzal caah nangmah zangfah awk kha aa tim ko. Lunglawmhnak hi Bawipa I bochannak cungin a chuakmi a si.

Biahmaithi: A sunglawimi caan tha ka hmuh  caah lamhruaitu Pathian ka thangthat i tuanvo ngeitu nan cungah kaa lawm. Pumpak cio nan cungah Pathian thluachuahnak um ko seh. Ni thiazingah i ruah ti awk  ka duhmi cu, Bawipa kan/ka cungah  aa lawm hnga maw? A si loah kan/ka mahtah kan/kaa I lawm maw? ti hi a si.

Ni hin vawleipi kan zoh tikah buainak in a khat, thah le  nawn a tam, hlen le rawi a thing lo, lihchim le hrawkhrol a tam, daihnak le dawtnak a kik, hna ngamnak a um kho lo.  Vawleipi hi Pathian nih a hei hmuh dih ko va si kaw, zeitin dah a hei kan hmuh cio ning a si hnga ti ka ruat. Nun aa lawm/nuam kho lomi mi tampi um a si.

1)      Rampi buainak(ral)ruangah: A tu lio media thawngla pawl nih an hun tial ciomi vawileipi a hnin tu cu North Korea ral thawh lai le an president pa Kim Jong Un kong hi a si. Hi pa hi kum 29 lawng a si mi mino te a si amah uknak tangah a rammi hna cu mangtam in an um, an  thi le an sa tiang i ei in a rammi hna nih sifahnak an tuar, thinphang le lungrethei in an um,  a sinain ral thawh rumro aa tim i American le South Korea cu a tlerh khawnh thluanghluan hna, thin dawmh in an um, UNO pi a thin a phang, vawlei pi ral pathumnak zong a chuahpi hmanh maw tiah ceih le phai in a um. Ka lungah a chuak ngaimi cu I King 2: 1ff, ah Solomon fapa Rehoboam cu Isreal mi hna nih an siangpahrang i an hun ser tikah a mi hna an aunak aw kha ngai duh loin ningcang loin biachahnak a tuah tikah i doh le i ralnak i then le i cheunak a chuak i a pennak cu a kuai rup ko.

2)      Abuu buainak ruangah: Kan theih bantuk in a tu lio Kawlram ah Kachin buainak, mibuu (biaknak)  buainak, a um ruangah thih lohnak, sunghralhnak tampi a chuak, ramchungmi an hna ngam ti lo, tih phannak an ngei, pakhat le pakhat an i zum lo ral ah an i ruat, cucaah an puaisunglaw tingyan hmanh ah mibu buainak a um sual lai ti an phang,cozah nih ralvengtu tha tak in kan chiah lai an ti. Mibu buainak in rampi a buai kho.  Cucu a tu lio cozah zong nih a tih ngaimi a si ve.

3)      Cungkhar buainak ruangah : Nu le va kar ah dawtnak a tlawm tikah cungkhar a buai, i then cheunak a chuak, fa le an riangvai, a tu lio hrawng kan theih tawnmi cu nu le va i thahnak hrinmi fale he i dohralnak le i thah nawnnak kong hna an si. Chungkhar hmanhah pakhat le pakhat an i zum ti lo, an i tih i ral in an i hmu.

4)      Pumpak kan nunnak i buainak ruangah: Mah zawnlawng i ruahnak, porhlawt ruamkainak, duhfah hakkauhnak, thazaang der deuhmi nam netnak, Pathian or Biaknak zeirel lonak etc…hi ruahnak lungput ruangah mi zong an that, sualnak phun phun an tuah. Minung pumpak hrimhrim hi I tih a si cang.

Hi buainak hna chung hin kan nih tah kan luat tiah na ruat maw? Kei nih cun Laimi kan nun ah siseh, a hlei in Khrifami kan nun ah hram a rak um ngai cangmi a si  tiah ka ruah. Khua le ram, peng le tlang tanhnak, Khrihfabuu pakhat le pakhat i dohkalhnak, Khrihfa inchungkhar buainak phunphun I thenkhuai, i cheu hmalnak, pumpak nun ah Khrihfami ko hi zumhtlak lo kan tam lih kan chim, fir kan hmang, mi leirawi kan hmang. Mi thangchiat kan hmang rih. Hruaitu hna nih hmunhma kan i cuh, kan member hna an herhbau mi le an feeling kan theih piak kho hna lo. Kan mah min thatnak lawng kan kawl. A sinain Pathian kan cungah vel a ngei rih i a thla zung tein an kan huh rih. Cucaah u le nau hna mi ngan i cawi kan si tikah le tuanvo pek kan si tikah ka mipi hna an sal ka si hmasa ko lai ti pawm khawh le an aunak aw theihpiak khawh i zuam in a thatnak bik lam a kawlpiak khotu hruaitu si hi a herh ngai ko rua tiah ka ruah. Cu ve bantukin hruaitu pakhat nih cun a thawnnak a um bantuk in a dernak cu a um ko. Thangthatmi/nak kong lawng theih a duhmi kan si sual ahcun kan dernak  a kan chimh ngam lomi kan si tinak a si. Zeicahtiah minung cu a tlingmi a hohmanh kan um lo.

Biatlang kawmnak: Cucaah kan dernak kan thawnnak zawn tha tein chimh ngammi hruaitu, phun dang in, midang ruahnak a thami cungah aa hrawm khomi kan si ahcun pumpak kan nun ah siseh, cungkhar le mibuu he kan I pehtleihnak ah siseh, Khrihfabu, peng le tlang miphun le ram ah siseh remnak a um lai. Pumpak kan that ahcun chungkhar a tha, chungkhar in mibuu ah mibuu in rampi ah daihnak, remnak a um lai. Rampi a that i aa rem  tikah rammi nunnak ah  lawmnak le hnangamnak cu a tling lai.

Hi thil vialte tlamtlintertu cu Bawipa I bochannak thawng in kan hmuh  dingmi teinak a si. A velngeihnak in a kan hngah ko.Bawipa cu a dingmi thil a tuahtu a si caah nangmah/ keimah zangfak awk kha aa tim ko. Paul nih a  zungzal in I lawm uh, a zungzal in thlacam uh,   a ti  bantuk in Amah Pathian bia le thlacamnak in kan tlaih chih lawngah hi thil vialte hi tlam a tling lai I, Bawipa kan cungah aa lawm lai, A mithmai tha kan hmuh lai.       

“ Lunglawmhnak cu Bawipa I bochannak chungin a chuakmi a si”.

Hniang Tial.

Thank you!!!