BIAHMAITHI
2011 cu tlaih khawh lo in a liam ko cang. 2011 chungah mirum, mifim, bawi le upa tampi an thi. US ah apple computer, Ipod a thoktu Steve Jobs, Maj. Kadafi, Kim Jung IL tbk hna an liam.Arap ram cheu khat an buai mi nih thil tam pi kan nunnak tuan bia an kan chim. N. Korea pres. Kim Jong Il nihcun Communist a dir khawhnak hnga mipi a hrem hna i, Czech pres. Vaclav nihcun Mipi an dir khawhnak hnga communist uknak a hrawh.Theisein cozah zong nih Niangngazi thawng thlak pawl achuah hna. Cubantuk cun 2011 ah kan i ruah bu in siseh, kan i ruah loin siseh kan tuahmi vialte kha 2012 ca le kan thih hnu tiang caah thlaici kan tuhmi an si dih. 2011 i kan tuah ciami cu remh le let awk a tha ti lo nain 2012 caah cun caan tha kan ngei rih, 2012 ah zeitindah kan nun lai?
Pathian nih A Mi hna hi Zei tuah dah a kan Fial!
Matthai chung ah mi le mi kar ah remnak a ser tawn tu cu lunglawm mi nan si dah’Pathian nih, ka fa, tiah an ti hna lai. Pathian nih tuah u ati mi tuah ruangah hremnak a ing mi cu lunglawm mi nan va si dah’ Vang cung pennak cu nanmah ta asi.Matthai 5:9.10 “Cu caah atu cu Bawipa kha ttih uh law, amah rian kha lung tak te le zumh awk tlak tein ttuan tuah uh”, “kei le ka inn chung khar tu nih cun Bawipa kha kan biak ko lai”. Joshua 24:14, 15
Bible umtuning fianternak: Matthai Thawng Tha Bia nih hin Jesuh nih Khamhtu kan pek hna lai tiah bia arak i kam mi kha asi I Biakam Hlun chung i Israel mi hna sin ah bia a kam mi atlinnak asi kha a kan chim. Tlang cung cawnpiaknak le van cung pennak chung i a um mi an ziaza , an tuah awk rian, an hmunh hnga asi mi thil le adonghnak ah zei dah asi lai ti kha kan hmuh.Matthai Thawng Tha chung ah fiang tein a langhtermi cu Remnak le thil tha tuah nih Pathian sin ah lawmhnak, hngangamnak, lungrualnak le zumhnak le nun can ziaza ah i biatak a herhnak kha kan hmuh.
Biakam hlun kan relmi ah Joshua nih Israel mi hna Izipt sal an tannak in an luat i Jordan varal an peh dih hnu Canan ram ah um hmun khuar an timh lai Shekhem ah upa lungfim vialte a pumh hna i bia a ruahmi hna a si. A chimhmi hna ah Abraham a pa Terah chan Zufrates hmun an rak umnak in Bawipa nih Abaraham a kawh i Canan ram ah a hruai hnu ah tefa tampi he thluachuah a pek i hmun a khuar ternak in a thawk. Cu hnu ah Isak in Jakob chan Izipt an kalnak in Moses le Aaron hmang in Rili sen tannak in amah Joshua chan ah an pa Abraham a rak kamhmi Canaan ram an phak tiang a hruaitu hna hi Bawipa Pathian a sinak a chimh hna.
Hi vialte Isreal mi nih ral nan tei le ramtha nan phak hi nanmah ti khawhnak le thawnnak aa tel lo. Pathian thluachuah a si hi philh hlah uh! Cu caah Bawipa kha ttih uhlaw Amah rian kha lungtak te le zumh awk tlak tein ttuan tuah uh, Amor mi hna biak mi siasal cu dah nan biak ko lai, a zei nan I thim zong ah kei le ka inn chungkhar cu Bawipa long kan biak ko lai” ti kha a chimhmi hna a si. Hi baibal caang thim 2 chirchanh in Pathian nih A mi hna hi zei tuah dah a kan fial ti kha ruah tti ding ah sawm kan duh hna.
Bawipa nih A mi hna siter a kan duh bikmi cu Mi le mi kar ah remdainak tuah Mi dang cungah thatnak tuah a kan fial. Mi cung ah thatnak kan tuah khawh lo hmanh ah mi tuah mi va bawmh le rian tuan tti thiam kan herh. Cu caah Pathian nih Amah muikeng in sermi "Zeitindah kan nun ti kha tha tein i ruat than u ti ka duh. Pathian nih A minung si ter a kan duh bikmi cu Amah Bawipa thangtthat le A sin lawmhnak bia chim lawng si lo in Mi caah remnak tuah le mi va bawmh Pathian nih an kan duh pi mi asi.
A si kun ah zei ruang ahdah Pathian nih remnak le thatnak tuah a kan fial? Kan theih cio bangin ni hin vawi lei cung thil sining tuan bia nih tam pi an kan chim. Mi pi duhnak tel lo in mah duh le mi pi caah thil tha tuah lo in mah chungkhar caah thatnak lawng a ruat mi uk tu tam pi anun nak a liam ning zoh tik ah thil dawh lo ngai an liam hna.Hi nih an kan chimh duh mi cu that lonak kan tuah ah si seh thatnak kan tuah ah si seh kan tuh ning bang in kan zun than tinak asi. Cu caah pumpak pakhat cio kan nun nak ah si seh, kan chungkhar le kan pawngkam ah that tuah le mi caah remdaihnak tuah I zuam hna u sih.Thil tha kan tuah ruang le thil tha lo kan doh ruang ah hrem zong kan tong thawng thlah hren zong kan tong khawh ko si hmamseh law tttih hlah u si zeica tiah Pathian nih thatnak le dainak tuah hi a kan duh pi mi asi.Matthai 5:10 -11 chung ah Pathian nih tuah u, ati mi tuah ruang ah hremnak a ing mi cu lunglawmh mi nan va si dah van cung peng nak cu nan mah ta ati . Van cung khua ah laksawng tam pi chiahpiak nan si ko an kan ti ,ah mah Pathiam bia asi.
Cu caah Pathian nih Amah thangtthat le lawmhnak bia chim a kan fial hnawh chan mi lawng si lo a mah Pathian nih an kan fial mi Mi le Mi kar remdaihnak ser le Mi caah thanak tuah an kan fial mi kha maw philh lai cih! ti kha ralrinnak a kan pek a si.
Chin mi Khrihfa kan si ruang ah Kawl ralkap cozah nih a kan huat cawlh ve, biaknak lei hremnak in, nu hrin covo buar piak tiang harnak phun tling kan tong. Kan si a fak, nun a har, cu caah kan ram ah kan um ngam ti lo. Ralzam ah kan i chuah. Kan zamnak lamthluan ah harnak phuntling kan tong rih. Nunnak tampi a liam. Kan nun zia arawk. Nihin Theisein cozoh nih Tlang Cung mi hriam tlai pawl he cabuai cung ah remdiahnak ser i kawl ram tlenh an duh lio pi asi. Mah vial tel harnak kan ing tuar mi vial te Chim ram ah a um lo nak hnga CNF zong nih cabuai cung ah chim rel lio pi asi I amah Pathian nih remdaihnak ceihkhan tu hna um pi ko hna seh law, thil ttha a chuah khawh nak hnga Pathian sin ah thla cam bawm cio hna u seh. 2012 cu Kawlram nih thluachuah a hmuh kum si hram ko seh.
“Bawipa nih Amah sin lawmhbia chim le tthangtthat a kan duh lawng si lo in mi caah remdainak le tthatnak tuah zei tik hmanh ah philh hna hlah uh sih. Cu hnu ah Bawipa nih kan duhnak cu a tlin ter hrim ve ko lai”.
Salai Robert Tum Mang Ling
CLSU
No comments:
Post a Comment